|
FADIGHE INUTILI
Sveiàrse sensa pressia 'na matina,
stirarse e remenarse dentro el leto
e dopo andàr de corsa verso el specio...
"Ma guarda che miracolo! Ci è sta?
Dormendo ò scancelà tuti i me ani
e m'è tornà la pele fresca e lissia,
i oci azuri come un fiordaliso
e i denti ben piantà, giusti, al so posto...
Miracolo! Miracolo!" ... E alora
te sì capita ti come 'na mata,
strapegandote a drio le to savate
e te m'è dito: "Sveiete veceto!
L'è ora che te salti zo dal leto!
De là in cusina è pronto el cafelate..."
Meio così! Son vecio come ieri:
rifar la strada e scomensiar de novo
barufe coi pensieri e con la gente...
sarìa fadiga che no' serve a gnente.
|
