|
L'ORA DE LA SIGNORA
L'è ora che te parti e su la porta
ch'è la Signora in nero che la speta...
la speta sensa un poco de pietà,
la riva e basta... e bisogna 'ndàr.
Parlarghe par convinzarla no' serve,
ela la ga da far el so mestier:
in giro giorno e note a trovar su
gente che da doman no' la gh'è più.
Ma so che a tentar no' costa gnente
e fao la me domanda impertinente,
se ghe riesso ben, se no fa gnente...
..."Vorìa restar un po' de giorni ancora,
spetar che vegna almanco primavera,
guardàr la luna, el sol, nasàr i fiori,
contarghe qualche fola ai me neòdi ...
e dopo, lo domando par piasèr,
vorìa molarghe un baso a me moièr"
Ela, la morte, l'à butà el nizzol,
l'à messo in tera el fero da segàr
e la m'à dito: "Tornarò domàn!
O visto che te gh'è tanto da far..."
No' steme ridar drio, lo so, l'è poco,
un giorno no' l'è mia l'eternità...
ma spero che domàn, fasendo 'l giro,
de mi la s'avia za desmentegà!"
|
