|
LA RIFORMA
Me piasarìa che Dio m'avesse dato
do anime invesse de du piè
par star al passo con la socetà
sensa sentir de note la cossiensa
che pèstola e pessata e me tien sveio.
Do anime sarìa 'na solussiòn:
una che sera i oci ai me pecati
e 'n' altra orba che me vede bon.
Pretendo massa? Sonti esagerato?
Mi credo che i cristiani de gran marca,
quei che se porta drio la santità,
par star in armonia con la cossiensa
un qualche truco i l'avarà inventà...
Ma no' dipende da la cativeria
e gnanca da la scarsa volontà...
L'omo fin che no' l more, poareto,
de dentro el resta sempre un buteleto
e quando el vede de la marmelata
la "gola" la desliga la cravata.
Mi spero che 'l Signor un giorno o l'altro
el pensa de cambiar la normativa:
le robe bele no' i è mia "reato";
solo se le fa schifo i è "peccato"
|
